ഹൈദരാബാദ്: പ്രശസ്ത തെലുങ്ക് നടനും ഡിജിറ്റൽ കണ്ടന്റ് ക്രിയേറ്ററുമായ കെ. ഭരത് കാന്ത് (31) ഹൈദരാബാദിലുണ്ടായ കാറപകടത്തിൽ അന്തരിച്ചു. ഹൈദരാബാദ് ഔട്ടർ റിങ് റോഡിലുണ്ടായ അപകടത്തിൽ ഭരതിനൊപ്പമുണ്ടായിരുന്ന സുഹൃത്തും മരിച്ചു. ഭരത് സഞ്ചരിച്ചിരുന്ന കാർ നിയന്ത്രണം നഷ്ടപ്പെട്ട് മുന്നിലുണ്ടായിരുന്ന കണ്ടെയ്നർ ലോറിക്ക് പിന്നിൽ ഇടിക്കുകയായിരുന്നു. അപകടത്തിന്റെ ആഘാതത്തിൽ കാർ പൂർണ്ണമായും തകർന്നു.
‘ടെനന്റ്’ , ‘ഗ്രാമം’ തുടങ്ങിയ തെലുങ്ക് സിനിമകളിലൂടെയും ശ്രദ്ധേയമായ വെബ് സീരീസുകളിലൂടെയും ഭരത് കാന്ത് പ്രേക്ഷകർക്ക് പ്രിയങ്കരനായിരുന്നു. അഭിനയത്തിന് പുറമെ സോഷ്യൽ മീഡിയ പ്ലാറ്റ്ഫോമുകളിലും അദ്ദേഹം വളരെ സജീവമായിരുന്നു. ഇൻസ്റ്റഗ്രാമിൽ 40,000-ത്തോളം ഫോളോവേഴ്സുള്ള അദ്ദേഹത്തിന് യൂട്യൂബിലും വലിയൊരു ആരാധകവൃന്ദമുണ്ട്. ഭരത് കാന്തിന്റെ അപ്രതീക്ഷിത വിയോഗത്തിൽ തെലുങ്ക് സിനിമാ ലോകവും സോഷ്യൽ മീഡിയ കൂട്ടായ്മകളും അനുശോചനം രേഖപ്പെടുത്തി. സംസ്കാരം പിന്നീട് നടക്കും.
